စစ်တပ်ပိတ်ဆို့မူကြောင့်အရပ်သားများပိုမိုသေဆုံး

စစ်ကောင်စီတပ်က ချင်းပြည်နယ်၊ မင်းတပ်မြို့ရှိ စစ်ဘေးရှောင်များအတွက် ဆေးဝါးနှင့် ရိက္ခာ ထောက်ပံ့ရေးလမ်းကြောင်းကို ပိတ်ဆို့နေခြင်းကြောင့် ၇ လအရွယ်ကလေးတစ်ဦး ဆေးဝါးပြတ်လပ်၍ သေဆုံးသွားရာ ထိုဖြစ်ရပ်ဆိုးမျိုး ပိုမိုများပြားလာဖွယ်ရှိနေသည်ဟု စစ်ရှောင်စခန်းစီမံခန့်ခွဲရေးကော်မတီမှ တာဝန်ရှိသူတစ်ဦးက ပြောသည်။

“သုံးပတ်လောက်စာလောက် ဆန်ကတော့ ရှိတယ်။ ဒါပေမဲ့ ကုန်ခြောက်ရိက္ခာတော့ ကျွန်တော်တို့မှာ လုံးဝ ပြတ်သွားတယ်။ ဒီတိုင်းသာ ဆက်ပိတ်ထားမယ်ဆိုရင် ကျန်းမာရေးထောက်ပံ့မှုတွေလည်း အရမ်းကို လိုအပ်နေတယ်။ စစ်ရှောင်တွေ နာမကျန်းဖြစ်ပြီး သေဆုံးမှုတွေတောင် မကြာခင် အများအပြားရှိလာနိုင်ပါတယ်” ဟု ကော်မတီ၏ပြောရေးဆိုခွင့်ရှိသူ ကိုလောရန့်က ဆိုသည်။

ဇွန် ၁၈ ရက်နေ့က မဲင်းကျေးရွာမှ စစ်ရှောင်မိသားစုဝင် ခွီရှိန်းဘူနိန်အမည်ရှိ ထိုကလေးသည် အအေးမိဖျားနာရာတွင် ကုသရန် ဆေးဝါးပြတ်လပ်သောကြောင့် သေဆုံးရသည်ဟု မင်းတပ်မြို့ပြည်သူ့အုပ်ချုပ်ရေးအဖွဲ့က ထိုနေ့တွင် သတင်းထုတ်ပြန်သည်။ ယင်းနေ့တွင်ပင် အသက် ၆၀ ဝန်းကျင်ရှိ ဦးလောငိုင်းလည်း အလားတူ သေဆုံးသည်ဟု ဒေသအခြေစိုက် သတင်းဌာနများက ဖော်ပြကြသည်။ 

မေ ၂၁ ရက်နေ့ကလည်း စစ်ရှောင်မိသားစုဝင် ၆ ရက်သားအရွယ် မွေးကင်းစကလေး သေဆုံးသွားရာ လိုအပ်သည့် ကျန်းမာရေးစောင့်ရှောက်မှု မရရှိသဖြင့် သေဆုံးခြင်းဖြစ်သည်ဟု သိရသည်။  

လက်ရှိတွင် စစ်ရှောင်သူများမှာ ဆန်ပြုတ်နှင့် ထမင်းတစ်နပ်ခန့်သာ စားရသည့် အခြေအနေရှိပြီး ဆေးဝါးနှင့် ရိက္ခာပို့ဆောင်ရေးကို ဆက်လက်ပိတ်ဆို့ထားပါက မကြာမီရက်ပိုင်းအတွင်း သေကြေပျက်စီးမှုရှိလာနိုင်သည်ဟု ကိုလောရန့်က ပြောသည်။

ယင်းအခြေအနေကို ဖြေရှင်းရန် ချင်းပြည်သူ့တပ်ဖွဲ့ (CDF) က စစ်ကောင်စီတပ်ဖွဲ့နှင့် ညှိနှိုင်းရန်ကြိုးစားနေသော်လည်း စစ်ကောင်စီတပ်ဖွဲ့ဘက်က ယတိပြတ် မငြင်းဆိုသကဲ့သို့ ပိတ်ဆို့မှုဖယ်ရှားရန် သဘောတူခြင်းလည်း မရှိသေးကြောင်း ၎င်းက ဆက်လက်ပြောသည်။

IDP ခေါ် ပြည်တွင်းနေရပ်စွန့်ခွာ တိမ်းရှောင်နေရသူတို့ကို တိုက်ပွဲများနှင့် ဝေးရာတွင် နေရာချပေးရေး၊ ဆေးဝါးနှင့် ရိက္ခာ ကူညီထောက်ပံ့လိုသည့် နိုင်ငံတကာအဖွဲ့အစည်းများ၏ ကမ်းလှမ်းမှုကို လက်ခံပေးရေးတို့ လိုအပ်နေသည်ဟု ၎င်းက ဆိုသည်။

“IDP တရားဝင်ဖြစ်တဲ့တိုင်အောင် ထောက်ပံ့လာတဲ့ ရိက္ခာတွေကို ထပ်မံဖျက်ဆီးမယ်ဆိုလည်း ကျွန်တော်တို့က ဘာမှတော့ လုပ်လို့ မရဘူး။ တစ်ခုရှိတာက နိုင်ငံတကာအဖွဲ့အစည်းတွေက ရိက္ခာထောက်ပံ့ပေးဖို့ ကြိုးစားပေးမှုတွေ ရှိနေတယ်။ ဒါပေမဲ့ စစ်ကောင်စီဘက်က IDP camp ရှိတဲ့နေရာကို ရိက္ခာပို့ဖို့ သဘောမတူသေးဘူးလို့ ကြားသိရပါတယ်” ဟု ၎င်းက ဆက်လက်ပြောသည်။

မင်းတပ်တွင် စစ်ရှောင်ဦးရေမှာ ၁၂၀၀၀ ကျော်အထိ တဖြည်းဖြည်း မြင့်တက်နေသည်။ 

စစ်ရှောင်များထဲတွင် ၁၀ နှစ်အောက်အရွယ် ကလေးသူငယ်ဦးရေမှာ ၅၀၀၀ နှင့် ၆၀၀၀ ကြား ရှိပြီး ကလေးများအတွက် လုံခြုံနွေးထွေးစွာ နေထိုင်နိုင်မည့် နေရာလိုအပ်သည်ဟု ကိုလောရန့်က ဆက်လက်ပြောသည်။

မင်းတပ်၏ စပါးထွက်နှုန်းမှာ မြို့လူဦးရေ လေးပုံတစ်ပုံအတွက်သာ ဖူလုံသည်ဟု အထွေထွေအုပ်ချုပ်ရေးဦးစီးဌာန အင်တာနက်စာမျက်နှာတွင် ဖော်ပြထားသည်။

မင်းတပ်အခြေအနေနှင့် ပတ်သက်ပြီး စစ်ကောင်စီက လတ်တလော သတင်းထုတ်ပြန်ခြင်း မရှိသေးပေ။

စစ်ကောင်စီတပ်ဖွဲ့ဝင်များသည် မင်းတပ်မြို့ရှိ စစ်ရှောင်စခန်းများအတွက် ထောက်ပံ့ပေးနိုင်မည့် လမ်းကြောင်းများ ဇွန်လဆန်းကတည်းက ဖြတ်တောက်ထားသည်။

ဇွန် ၁၆ တွင် ​ကျောက်ထုမြို့မှ ​​ဆေးဝါးနှင့် စားနပ်ရိက္ခာများ ဝယ်ယူပြီး မင်းတပ်သို့ ပြန်သည့်၂၉ နှစ်အရွယ် ဆလိုင်းလော​ဂေ၊ ၂၆နှစ်အရွယ် ​ဆလိုင်းဂေအွမ်၊ ၂၉ နှစ်အရွယ် ဆလိုင်းမှန်ထွန်းတို့ ၂ ရက်ကြာ ဖမ်းဆီးစစ်ဆေးခံရသည်။

ဇွန် ၁၃ တွင် မြို့ရှိ ရေသန့်စက်ရုံတစ်ရုံကို စစ်ကောင်စီတပ်က ဖောက်ခွဲဖျက်ဆီးခဲ့သည်ဟု မင်းတပ်မြို့နယ်ပြည်သူ့အုပ်ချုပ်ရေးအဖွဲ့က သတင်းထုတ်ပြန်သည်။ 

မင်းတပ်မှ အခြား ရေသန့်စက်ရုံတစ်ရုံမှာ ချင်းပြည်နယ်၏ စည်ပင်ဝန်ကြီးဟောင်း ပြည်ခိုင်ဖြိုးပါတီဝင်တစ်ဦးက ပိုင်ဆိုင်ပြီး ဖျက်ဆီးခံရခြင်း မရှိဟု ထုတ်ပြန်ချက်တွင် ဖော်ပြသည်။ 

မေ ၁၉ တွင် စစ်ရှောင်သူများအတွက် ကလေးမြို့တွင် အလှူငွေထုတ်ယူသူ ကိုအောင်ထန်းဖေကို စစ်ကောင်စီက ဖမ်းပြီး အလှူငွေ သိန်း ၁၇၀ ကို သိမ်းလိုက်သည်။

စစ်ရှောင်များအကူအညီရရှိရေးအတွက် ပြည်တွင်းပြည်ပအဖွဲ့အစည်း​များကို ချိတ်ဆက်ပေးနေသည်ဟု မင်းတပ်မြို့စစ်ရှောင်သူများအတွက် အလှူခံနေသည့် Mindat Emergency Respon Team ပေ

ြာသည်။

acebook စာမျက်နှာတွင် ရေးသားထားသည်။