ရန်ကုန်၊ ဇွန် ၁၄
မန္တလေး စစ်အာဏာရှင်ဆန့်ကျင်ရေး သပိတ်စစ်ကြောင်းတွင် ရှေ့တန်းမှ ကြွချီပါဝင်နေသည့် မန္တလေး ဘုရားကြီးတိုက်ဝင်း၊ အာသောကရာမတိုက် ကံသာကျောင်းမှ ဆရာတော် ဦးဇဝနကို ၎င်း၏ ဒကာတစ်ဦးကို ဖုန်းဆက်ပင့်ဆောင်ခိုင်းပြီး အကြမ်းဖက်စစ်ကောင်စီတပ်များက လူမြင်ကွင်းတွင် ရိုက်နှက်ဖမ်းဆီးသွားကြောင်း မျက်မြင်တွေ့ရှိရသူများက ရန်ကုန်ခေတ်သစ်သတင်းဌာနသို့ ပြောဆိုသည်။
ဇွန်လ ၁၄ ရက်နေ့ နံနက် ၆ နာရီ ၁၅ မိနစ်တွင် အကြမ်းဖက်စစ်ကောင်စီတပ်များက မန္တလေး မဟာမိတ်တပ်ပေါင်းစု သပိတ်စစ်ကြောင်းကို ကားဖြင့်တိုက်ခြင်း၊ သေနတ်ဖြင့် ပစ်ခတ်ခြင်း စသည့် ရက်စက်သော ဖြိုခွင်းမှုများကို လုပ်ဆောင်ခဲ့ကြောင်း၊ သပိတ်တွင်ပါဝင်သော ဆရာတော် ဦးဇ၀နသည် ဖြိုခွင်းခံရမှုမှ လွတ်မြောက်သွားသော်လည်း ဒကာတစ်ဦးက ဖုန်းဆက်၍ သွားရောက်ရာမှ အကြမ်းဖက်စစ်ကောင်စီတပ်များက ထောင်ချောက်ဆင် ရိုက်နှက်ဖမ်းဆီးသွား သည်ဟု မျက်မြင်တွေ့ရှိရသူများက ဆိုသည်။
"ဆရာတော်က သပိတ်ဖြိုခွင်းခံလိုက်ရချိန်မှာ လွတ်မြောက်သွားခဲ့ပေမယ့် ဦးဇင်းနဲ့ရင်းနီးတဲ့ အဖမ်းခံလိုက်ရသူဒကာတဦးက ဖုန်းလှမ်းဆက်ခေါ်လို့ လွတ်မြောက်နေရာမှ ပြန်အသွားမှာ
စစ် ကောင်စီတပ်များရောက်လာပြီး ဦးဇင်းကို ဝိုင်းပီးရိုက်တယ်။ အနားကို ဘယ်သူမှမလာနဲ့ပြောပြီး ဆရာတော်ကို ရိုက်နှက် ဖမ်းဆီးခေါ်ဆောင်သွားတယ်"ဟု မန္တလေးမှ နိုင်ငံရေးတက်ကြွလှုပ်ရှားသူ ဦးသိန်းအောင်မြင့်ကဆိုသည်။
ဗုဒ္ဓဘာသာမှ ဘုရားသားတော် ရဟန်းတစ်ပါးကို အကြမ်းဖက်စစ်ကောင်စီတပ်များက ရိုက်နှက် ဖမ်းဆီးခြင်းသည် ရိုင်းစိုင်းသော လုပ်ရပ်ဖြစ်ကြောင်း ပြောဆိုသည်။
"သံဃာကို သံဃာလို့မြင်ရင် ရိုက်ပီးဖမ်းစရာမလိုသလို သူတို့ဖမ်းလို့မမိလို့ လွတ်သွားတဲ့ သံဃာတော်တစ်ပါး ငြိမ်းငြိမ်းချမ်းချမ်းဆန္ဒပြတာ အခုလိုထောင် ဖမ်းစရာလည်း မလိုဘူး" ဟု ၎င်းက ဆက်လက်ပြောဆိုသည်။
အကြမ်းဖက်စစ်ကောင်စီတပ်များသည် ဇွန်လ ၁ ရက်နေ့ကလည်း မန္တလေး မစိုးရိမ်တိုက်သစ်တွင် ပရိတ်ရွတ်ဖတ်သည့် သံဃာတော်များကို ဆဲဆိုခြင်း၊ သေနတ်ဖြင့် ပစ်ခြင်း၊ ရမ်းကားခြင်းများ ပြုလုပ်ခဲ့သေးသည်။
ဓာတ်ပုံ- မန္တလေး မဟာမိတ် တပ်ပေါင်းစု သပိတ်စစ်ကြောင်းမှ ဆရာတော် ဦးဇ၀န။
https://www.facebook.com/khitthitnews/photos/a.386800725090613/1221979858239358/
No comments:
Post a Comment